Armand Duka do të vazhdojë të drejtojë Federatën Shqiptare të Futbollit, pasi u rizgjodh në krye të institucionit gjatë punimeve të Asamblesë së Përgjithshme Zgjedhore. Ky është mandati i tij i shtatë radhazi, ndërsa mban postin e presidentit që prej vitit 2002.
Asambleja u zhvillua në ambientet e “Shtëpisë së Futbollit”, ku delegatët vlerësuan drejtimin, vizionin dhe rolin e Dukës në zhvillimin e futbollit shqiptar, si në aspektin sportiv, ashtu edhe në atë organizativ e institucional. Kandidatura e tij u mbështet nga 33 anëtarë të FSHF-së.
Gjatë drejtimit të tij, futbolli shqiptar ka regjistruar disa arritje të rëndësishme, mes të cilave dy kualifikimet historike të Kombëtares në Kampionatin Evropian. Procesi i votimit u zhvillua sipas parashikimeve statutore, në prani të delegatëve të klubeve dhe shoqatave rajonale.
Me këtë rizgjedhje, struktura drejtuese e futbollit në vend siguron vazhdimësinë për katër vitet e ardhshme. Në mandatin e ri, prioritet do të jenë projektet për përmirësimin e infrastrukturës sportive dhe rritjen e cilësisë së futbollit vendas.
