Qytetari denoncon postat në Shqipëri: Na bashkojnë porositë online për të kaluar tarifat doganore

Një qytetar ka denoncuar pranë redaksisë tonë një rast që, sipas tij, lidhet me tarifa të padrejta doganore nga kompanitë postare pas blerjeve në platformat online.

Ai ka treguar se pak kohë më parë ka blerë një produkt me vlerë 10 euro në AliExpress, por kompania postare në Shqipëri, me emër "Intexcourier" i ka kërkuar të paguajë rreth 12 mijë lekë të vjetra doganë, me pretendimin se vlera totale e porosisë tejkalon kufirin prej 22 eurosh, mbi të cilin aplikohet tarifë doganore në Shqipëri.

Qytetari pretendon se posta ka bashkuar dy produkte të blera në ditë të ndryshme dhe nga dy dyqane të ndryshme online, duke i llogaritur si një dërgesë të vetme për të kaluar pragun prej 22 eurosh. Sipas tij, kompania i ka dërguar vetëm një numër gjurmimi (track order) ndërsa numrin e dërgesës tjetër nuk ia ka bërë të disponueshëm në mënyrë që porositë t'i marrë bashkë.

Ai shprehet se për produktin prej 10 eurosh ka paguar 5 euro transport, ndërsa artikulli tjetër kapte vlerën 17 euro. Në total vlera është llogaritur 32 euro dhe për këtë arsye i është kërkuar pagesa e tarifës doganore pasi në të kundërt, i është komunikuar se porosia do të kthehet në Kinë.

Denoncuesi shton se ka tentuar të kontaktojë me institucionet doganore për sqarime, por sipas tij, nuk ka arritur të marrë përgjigje telefonike. Ai pretendon se kjo praktikë është përsëritur disa herë dhe se, ndryshe nga kompanitë e tjera postare që dorëzojnë produktet pa probleme kur vlera është nën kufirin doganor, në këtë rast është ndjerë i detyruar të paguajë tarifë shtesë.