Besimtarët myslimanë në mbarë botën, përfshirë edhe ata në Shqipëri, janë në pritje të nisjes së muajit të shenjtë të Ramazanit – një kohë reflektimi, faljeje, lutjeje dhe solidariteti. Ramazani është muaji i nëntë i kalendarit hënor islamik dhe konsiderohet periudha më e rëndësishme për besimtarët, të cilët agjërojnë nga agimi deri në perëndim të diellit.
Gjykata e Lartë e Arabisë Saudite u ka bërë thirrje zyrtare të gjithë myslimanëve në mbretëri që të mbajnë nën vëzhgim qiellin në mbrëmjen e së martës, 17 shkurt, për të parë hënën e re (hilalin). Autoritetet kanë kërkuar që kushdo që e dallon hënën me sy të lirë apo përmes dylbive, të njoftojë gjykatën më të afërt për të regjistruar dëshminë e tij.
Kur nis Ramazani 2026?
Nisja e muajit varet pikërisht nga ky vëzhgim. Bazuar në përllogaritjet astronomike, pritet që agjërimi të fillojë të mërkurën, më 18 shkurt, ose të enjten, më 19 shkurt 2026.
Kjo parashikohet për shumë vende të botës, përfshirë edhe Shqipërinë. Besimtarët shqiptarë do ta nisin agjërimin pas njoftimit zyrtar nga Komuniteti Mysliman i Shqipërisë (KMSH), i cili koordinon datën në përputhje me vëzhgimet përkatëse dhe botën islame.
Si agjërohet gjatë Ramazanit?
Gjatë këtij muaji, myslimanët abstenojnë nga ushqimi, pija, duhani dhe nevojat e tjera fizike nga agimi deri në perëndim të diellit. Dita e agjërimit përfshin dy momente kyçe:
*Syfyri – vakti para agimit, për të marrë energjinë e nevojshme për ditën.
*Iftari – vakti i mbrëmjes në momentin e perëndimit të diellit, kur familjet mblidhen për të thyer agjërimin së bashku.
Përtej abstenimit nga ushqimi, Ramazani është një kohë për përkushtim shpirtëror, për ndihmë ndaj atyre që kanë nevojë dhe për forcimin e lidhjeve familjare e shoqërore.
Ne u dëshirojmë të gjithë besimtarëve një muaj të mbushur me paqe, reflektim dhe solidaritet. Ramadan Mubarak!
