Gjatë Konferencës së Sigurisë në Mynih të mbajtur të shtunën më 14 shkurt, Presidentja e Komisionit Europian, Ursula von der Leyen, ka dërguar një mesazh të fortë se Bashkimi Europian duhet të ndryshojë mënyrën se si koncepton sigurinë dhe mbrojtjen e tij në botë, duke kaluar nga një periudhë ku Europa mbështetet kryesisht në aleancat dhe tregun, drejt një modeli me përgjegjësi më të madhe kolektive për sigurinë.
Në fjalimin e saj, von der Leyen theksoi se Europa duhet të jetë e gatshme për të miratuar dhe zbatuar klauzolën e mbrojtjes së ndërsjellë të parashikuar në Traktatin e BE-së, duke theksuar se kjo nuk është një “opsion” por një “detyrim i përbashkët” që lind nga traktatet themeluese të bllokut. Klauzola e mbrojtjes së ndërsjellë nënkupton se vendet anëtare duhet të qëndrojnë së bashku dhe të ndihmojnë njëra-tjetrën në rast agresioni ndaj territori të një prej tyre.
Von der Leyen refuzoi idenë sipas të cilës Europa nuk mund të mbrojë veten pa Shtetet e Bashkuara dhe tha se është koha për të transformuar “fjalën në veprim”, duke bërë Europën më të fortë strategjikisht dhe më të pavarur në çështjet e sigurisë. Ajo argumentoi se Europa ka arritur një nivel të lartë shpenzimesh për mbrojtje, por që tani duhet të bëjë më shumë për të krijuar kapacitete reale mbrojtëse nëse dëshiron të jetë e besueshme si një partner i fuqishëm në arenën ndërkombëtare.
Fokusi i fjalimit nuk u ndal vetëm te mbrojtja ushtarake. Presidentja e Komisionit bëri thirrje që Bashkimi Europian të përdorë të gjithë instrumentet e tij, nga tregtia dhe financat deri te teknologjia dhe infrastruktura kritike, me një dimension të qartë sigurie, në mënyrë që kontinenti të jetë i përgatitur për sfidat e një bote gjithnjë e më të paqëndrueshme gjeopolitikisht.
Fjala e saj u mirëprit edhe nga liderë të tjerë europianë që kërkojnë autonomi strategjike, duke përfshirë edhe argumentet për bashkëpunim më të ngushtë të Europës me aktorë të tjerë si Britania e Madhe, Norvegjia apo Kanadaja.
