Pyetja nëse kryeministri Edi Rama ka vendosur përfundimisht të "lëshojë" bashkëpunëtoren e tij më të ngushtë, Belinda Ballukun, po merr vëmendje të madhe pas zhvillimeve të fundit në Kuvend. Mazhoranca socialiste duket se ka vendosur të mos e zvarrisë më shqyrtimin e kërkesës së SPAK për arrestimin e saj, duke njoftuar mbledhjen e Këshillit të Mandateve për javën e ardhshme. Burime pranë Kuvendit bëjnë me dije se kryetari i Kuvendit, Niko Peleshi, do të nxjerrë urdhrin zyrtar këtë të hënë, ku do të specifikohet ora dhe dita e saktë kur deputetët do të përballen me dosjen voluminoze të Prokurorisë së Posaçme.
Ky hap vjen menjëherë pasi Gjykata Kushtetuese nuk arriti të krijonte një shumicë për rastin e Ballukut, duke u ndarë në votim 4 me 4. Kjo ndarje e anëtarëve të gjykatës rrëzoi automatikisht kërkesën e kryeministrit Rama për të shpallur pezullimin si antikushtetues, duke lënë në fuqi vendimin e nëntorit të kaluar. Tashmë, me pezullimin nga detyra që mbetet aktiv, e vetmja pengesë për SPAK është imuniteti parlamentar, i cili pritet të shqyrtohet me urgjencë pas zbardhjes së plotë të vendimit të Kushtetueses në Fletoren Zyrtare.
Belinda Balluku ndodhet në një pozitë të vështirë ligjore pasi është marrë e pandehur për shkelje të barazisë në tenderat e Tunelit të Llogarasë, ndërkohë që hetimet vijojnë edhe për dosjen e nxehtë të 7 loteve të Unazës së Madhe.
Mbledhja e javës së ardhshme në Këshillin e Mandateve konsiderohet si prova e zjarrit për raportin e mazhorancës me drejtësinë e re. Nëse Këshilli do t'i hapë rrugë kërkesës së SPAK, kjo do të shënonte me shumë gjasa fillimin e fundit të karrierës politike në ekzekutiv për numrin dy të qeverisë.
