Fruthi po shfaqet si një kërcënim real për fëmijët në Tiranë. Edhe pse Instituti i Shëndetit Publik nuk ka bërë një deklaratë zyrtare, në një kopsht jo publik është regjistruar një shpërthim i sëmundjes.
Mësohet se disa fëmijë të pavaksinuar janë infektuar me fruth dhe e kanë transmetuar virusin tek njëri-tjetri. Prindërit janë njoftuar nga edukatoret që t’i mbajnë fëmijët në shtëpi, me qëllim shmangien e përhapjes së mëtejshme.
Nga informacionet e deritanishme bëhet e ditur se fruthi ka prekur fëmijë që nuk kishin përmbushur kalendarin e detyrueshëm të vaksinimit. Ndonëse ligji parashikon që asnjë fëmijë pa vaksinat e detyrueshme të mos pranohet në çerdhe, kopshte apo shkolla, rezulton se disa institucione jo publike e shkelin këtë detyrim, duke u kthyer në vatra të përhapjes së sëmundjeve infektive si fruthi, i cili mund të ketë pasoja të rënda.
Vatra e shpërthimit është izoluar, ndërsa aktualisht raportohen 15 raste të konfirmuara.
Në të njëjtën kohë, autoritetet shëndetësore pranojnë se mbulimi me vaksinën MMR vaccine, e cila aplikohet në moshën 1 vjeç, ka pësuar rënie për shkak të skepticizmit të disa prindërve dhe grupeve kundër vaksinimit. Aktualisht, mbulesa vaksinale për dozën e parë është rreth 83%, ndërkohë që Organizata Botërore e Shëndetësisë rekomandon një nivel prej 95% për të parandaluar shpërthimet.
Raste sporadike me fruth janë raportuar edhe në disa vende të Europës, duke e mbajtur sëmundjen si një rrezik të vazhdueshëm për shëndetin publik.
