Banorët e Luzit kanë dalë sërish në protestë mëngjesin e sotëm për shkak të gjendjes së rënduar të rrugës në zonë. Ata bllokuan për rreth një orë aksin kryesor, duke ndaluar qarkullimin e dhjetëra trailerëve dhe mjeteve të tjera të tonazhit të rëndë që kalojnë çdo ditë në këtë segment rrugor.
Protestuesit shprehen se kjo është hera e disatë që dalin në rrugë për të kërkuar zgjidhje, por deri tani nuk kanë marrë asnjë reagim nga strukturat shtetërore. Sipas tyre, amortizimi i rrugës po rrezikon sigurinë e banorëve dhe po vështirëson ndjeshëm lëvizjen e përditshme.
Gjatë ditës së sotme, banorët pritet të firmosin një peticion drejtuar Autoriteti Rrugor Shqiptar (ARRSH), ku kërkojnë informacion zyrtar se kujt i përket kjo rrugë dhe kur do të nisë rikonstruksioni i saj. Ata paralajmërojnë se protestat do të vijojnë nëse nuk ka reagim, duke shtuar se herën tjetër në tubim do të përfshihen edhe nxënësit e shkollës së zonës.
