Autoritetet kanadeze kanë identifikuar autoren e sulmit të ndodhur një ditë më parë në një shkollë, ku humbën jetën tetë persona dhe 25 të tjerë mbetën të plagosur.
Sipas mediave vendase, bëhet fjalë për 18-vjeçaren Jesse Van Rootselaar e cila kishte lindur si djalë, por 6 vite më parë, kur ishte vetëm 12 vjeç, kishte nisur periudhën e transformimit pasi ndjehej femër. Ajo u gjet e pajetë në vendngjarje dhe dyshohet se ka kryer vetëvrasje pas sulmit.
Hetimet paraprake tregojnë se, përpara ngjarjes në shkollë, e reja dyshohet se kishte vrarë edhe nënën dhe vëllain e saj 11-vjeçar. Trupat e tyre të pajetë u gjetën në një banesë pranë vendit ku ndodhi sulmi.
Mes viktimave në shkollë janë një mësuese 39-vjeçare, tre nxënëse 12 vjeçe dhe dy nxënës, një 12 dhe një 13 vjeç. Autoritetet kanë bërë të ditur se, bazuar në hetimet e deritanishme, nuk dyshohet për persona të tjerë të përfshirë në të shtënat.
Policia njoftoi gjithashtu se Van Rootselaar kishte braktisur shkollën e mesme Tumbler Ridge katër vite më parë.
