Pesëmbëdhjetë persona të dyshuar për përhapjen e propagandës së “Shtetit Islamik” (ISIS) në TikTok u arrestuan të martën gjatë bastisjeve të zhvilluara në disa zona të Holandës. Sipas Zyrës së Prokurorit Publik, të dyshuarit akuzohen se kanë nxitur të tjerët të kryejnë krime terroriste përmes publikimeve që përfshinin thirrje për t’iu bashkuar grupit dhe lavdërime për martirizimin. Disa nga postimet e shpërndara në platformë janë parë mbi 100 mijë herë.
Autoritetet bënë të ditur se hetimi nisi pas identifikimit të një llogarie në TikTok që shpërndante propagandë të ISIS-it me titra në gjuhën holandeze. Prokurorët theksuan se lavdërimi dhe përhapja e propagandës terroriste përbën kërcënim serioz për sigurinë publike dhe është vepër penale e dënueshme me ligj.
Sipas policisë, të arrestuarit janë të moshës nga 16 deri në 53 vjeç dhe përballen me akuza për nxitje të një vepre terroriste, përhapje propagande dhe/ose pjesëmarrje në organizatë terroriste. Trembëdhjetë prej tyre kanë shtetësi siriane, tre janë shtetas holandezë dhe katër janë të mitur. Një tjetër person ishte arrestuar në janar si i dyshuari kryesor, ndërsa autoritetet nuk përjashtojnë arrestime të tjera në vijim.
