Ghislaine Maxwell, bashkëpunëtorja e dënuar e Jeffrey Epstein, refuzoi t’u përgjigjej pyetjeve të Komitetit Mbikëqyrës të Dhomës së Përfaqësuesve të SHBA-së të hënën. Ajo u paraqit virtualisht nga burgu i Teksasit, ku po vuan një dënim me 20 vjet burg për trafikim seksual, dhe përdori Amendamentin e Pestë të Kushtetutës, që i jep të drejtën të mos përgjigjet për të shmangur vetë-inkriminimin.
Kryetari i Komitetit, James Comer, e konsideroi refuzimin e Maxwellit “shumë zhgënjyes”, duke theksuar se komiteti kishte shumë pyetje mbi krimet e saj dhe të Epsteinit, si dhe për bashkëpunëtorët e mundshëm. Ndërkohë, avokati i Maxwellit, David Oscar Markus, deklaroi se ajo ishte e gatshme të fliste plotësisht vetëm në rast se Presidenti Trump do t’i jepte mëshirë.
Para dëshmisë, një grup të mbijetuarish të Epsteinit i bëri thirrje komitetit të ishte skeptik ndaj informacionit të Maxwellit, duke kritikuar refuzimin e saj për të identifikuar të përfshirët dhe për të bashkëpunuar plotësisht me drejtësinë. Dëshmia e saj u shty disa herë dhe vjen ndërsa Departamenti i Drejtësisë ka publikuar miliona faqe dosjesh të reja nga hetimi ndaj Epsteinit.
