Ishte mesdita e ftohtë e 4 shkurtit 1998. Bill Gates, asokohe njeriu më i pasur në botë dhe figura kryesore e revolucionit digjital, po hynte në një ndërtesë qeveritare në Bruksel, i shoqëruar nga truprojat e tij.
Në një moment të papritur, nga turma u afrua një person dhe brenda sekondash fytyra e miliarderit u mbulua me krem dhe biskota. Një, dy, madje tre torta u hodhën ndaj tij, në një skenë që bëri xhiron e botës.
Autori ishte Noël Godin, një aktivist belg i njohur për “sulmet” simbolike me tortë ndaj figurave publike. Gates u largua menjëherë nga vendi i ngjarjes, ndërsa pamjet mbetën një nga episodet më të pazakonta në historinë e liderëve të teknologjisë.
Në fund të viteve ’90, ai shihej nga kritikët si simbol i fuqisë dominuese të industrisë së teknologjisë, dhe incidenti u interpretua si një akt satirik ndaj elitës ekonomike.
Me kalimin e viteve, përmes fondacionit të tij filantropik, Gates ndërtoi një profil të ri publik, duke u përfshirë në projekte globale për shëndetin dhe zhvillimin.
Megjithatë, në vitet e fundit, emri i tij është rikthyer në debat për shkak të takimeve të dokumentuara me financierin Jeffrey Epstein, edhe pas dënimit të këtij të fundit. Këto kontakte kanë ngjallur kritika dhe diskutime, ndërsa vetë Gates ka deklaruar se ato ishin një gabim në gjykim.
Sot, videoja e vitit 1998 nuk shihet më vetëm si një episod humoristik, por nga disa si një moment simbolik në historinë e një figure që ka kaluar nga manjat i teknologjisë në filantrop global, dhe më pas në një personazh që vazhdon të jetë subjekt debati publik.
