Viti 2026 ka nisur me një janar jashtëzakonisht të ngrohtë në shkallë globale, duke u renditur ndër pesë muajt e janarit më të ngrohtë të regjistruar ndonjëherë. Sipas Shërbimit të Ndryshimit Klimatik Koperniku (C3S), temperatura mesatare globale e ajrit në sipërfaqe në janar 2026 arriti në 12.95°C, që është 0.51°C më e lartë se mesatarja e periudhës 1991–2020. Ky muaj ishte vetëm 0.28°C më i ftohtë se janari më i ngrohtë i regjistruar ndonjëherë, ai i vitit 2025, dhe 1.47°C më i ngrohtë se niveli mesatar para-industrial 1850–1900.
Zëvendësdrejtoresha e C3S, Samantha Burgess, theksoi se janari 2026 tregoi se sistemi klimatik mund të prodhojë njëkohësisht mot ekstrem të ftohtë në një rajon dhe nxehtësi ekstreme në një tjetër. Hemisfera jugore përjetoi temperatura rekord gjatë këtij muaji, duke kontribuar në shpërthimin e zjarreve vdekjeprurëse në Australi, Kili dhe Patagoni, ndërsa temperatura mbi mesatare u regjistruan edhe në Arktik, Groenlandë, Amerikën e Jugut, Afrikën e Veriut dhe Antarktidë.
Në të kundërt, hemisfera veriore u përball me valë të forta të të ftohtit, veçanërisht në Amerikën e Veriut, Siberi dhe Evropë. Si pasojë, Evropa regjistroi janarin më të ftohtë që nga viti 2010, me temperaturën mesatare në sipërfaqen e tokës 2.34°C nën normë. Ky kontrast i skajshëm i temperaturave nënvizon ndryshimet e theksuara klimatike dhe ekstremet e motit që po bëhen gjithnjë e më të shpeshta.
