Xhudistja kosovare, Distria Krasniqi, vazhdon të shkëlqejë në skenën ndërkombëtare, duke i sjellë Kosovës një tjetër sukses. Ajo fitoi medaljen e artë në Grand Slam e Parisit në kategorinë deri në 52 kilogramë, duke mposhtur në finale spanjollen Ariane Toro Soler me Ippon për më pak se 10 sekonda.
Garën, Krasniqi e nisi nga raundi i dytë, ku dominoi ndaj francezes Alicia Marques. Në çerekfinale, ajo arriti një fitore të vështirë ndaj brazilianes Larissa Pimenta, ndërsa në gjysmëfinale triumfoi mbi Amandine Buchard.
Me këtë fitore, Krasniqi regjistron suksesin e nëntë në Grand Slam e Parisit dhe konfirmon statusin e saj si një nga xhudistet më të mira në botë.
