Reshjet e forta të ditës së sotme shkaktuan përmbytje në Himarë, pasi përroi që kalon pranë qendrës së qytetit u mbush brenda pak minutash. Banesat pranë shtratit të përroit u përfshinë nga uji, kryesisht në katet e para, duke shkaktuar dëme të konsiderueshme në orenditë shtëpiake.
Banorët e zonës akuzojnë bashkinë për menaxhim të keq të situatës, duke theksuar se përmbytjet ishin të parashikueshme. Ata theksojnë se ndërtimi i urës poshtë impiantit të ujërave të zeza, nga firma zbatuese e projektit, ka ngushtuar kanalin kryesor shkarkues, duke e bërë qytetin të pambrojtur ndaj reshjeve të mëdha.
Banorët paralajmërojnë se pa zgjidhje afatgjata në menaxhimin e përroit dhe kanaleve, Himara rrezikon përmbytje, duke shkaktuar dëme të vazhdueshme materiale dhe rrezik për jetën e qytetarëve.
