Bitcoin, kriptomonedha më e njohur në botë, ka shënuar një tjetër rënie të ndjeshme, duke shtuar humbjet pas një jave tejet të trazuar në tregjet financiare. Që nga fillimi i vitit, vlera e saj ka rënë me rreth një të tretën.
Monedha digjitale ra gati 14 për qind të premten në mëngjes, duke u tregtuar rreth 62 900 dollarë në orën 01:00 GMT. Kjo rënie vjen në vijim të një serie humbjesh të forta që nisën fundjavën e kaluar, kur Bitcoin ra nën nivelin e 80 000 dollarëve.
Pas këtij zhvlerësimi të fundit, Bitcoin, i njohur për luhatjet e mëdha të çmimit, ka humbur rreth një të tretën e vlerës që nga fillimi i vitit. Kriptomonedha kishte shënuar një rritje të fortë pas rizgjedhjes së Presidentit të Shteteve të Bashkuara, Donald Trump, duke nxitur pritshmëri për një regjim më miqësor rregullator ndaj kriptomonedhave, pas viteve të kufizimeve. Në dhjetor të vitit 2024, Bitcoin arriti për herë të parë nivelin e 100 000 dollarëve.
Megjithatë, aseti digjital ka ndjekur kryesisht një trajektore rënëse që prej tetorit, kur arriti një rekord historik mbi 127 000 dollarë, mes pasigurive gjeopolitike dhe rregullatore.
Një projektligj i mbështetur nga Trump për rregullimin e tregtisë së aseteve digjitale ka mbetur i bllokuar në Senatin amerikan, për shkak të ndarjeve mes bankave dhe kompanive të kriptomonedhave. Ndërkohë, kompania e kriptomonedhave e familjes Trump, World Liberty Financial, ka rënë nën vëzhgimin e Kongresit amerikan, pasi gazeta The Wall Street Journal raportoi se përfaqësues të një zyrtari nga Abu Dhabi kishin nënshkruar një marrëveshje për të investuar 500 milionë dollarë për një pjesëmarrje të konsiderueshme në këtë sipërmarrje.
Rënia e fundit e Bitcoin vjen në një kohë kur tregjet globale të aksioneve dhe mallrave po përjetojnë një valë të fortë shitjesh. Indeksi referencë i Wall Street, S&P 500, ra me 1.2 për qind të mërkurën, ndërsa Nasdaq Composite, i fokusuar në teknologji, u ul me rreth 1.6 për qind.
Aksionet e gjigantit teknologjik Amazon ranë me mbi 11 për qind në tregtimet pas mbylljes, pasi planet e kompanisë për të investuar 200 miliardë dollarë në infrastrukturë të lidhur me inteligjencën artificiale ngjallën frikë për një flluskë teknologjike.
Në rajonin Azi Paqësor, indeksi KOSPI i Koresë së Jugut ra me rreth 5 për qind në orët e para të tregtimit, ndërsa ASX 200 i Australisë dhe Nikkei 225 i Japonisë u ulën përkatësisht me mbi 1 për qind dhe 1.6 për qind.
Edhe metalet e çmuara, të cilat kishin përjetuar fitime të mëdha gjatë vitit 2025, vijuan serinë e fundit të humbjeve. Ari ra me mbi 4 për qind të enjten, duke u tregtuar rreth 4 720 dollarë për ons, ndërsa argjendi, i njohur për luhatje edhe më të forta, pësoi një rënie deri në 18.5 për qind, duke u tregtuar rreth 69 dollarë.
