Sipas të dhënave më të fundit të anketës "Security Meter 2025" nga Këshilli i Bashkëpunimit Rajonal, Shqipëria raporton nivelin më të lartë të pasigurisë financiare në Ballkanin Perëndimor. Më shumë se gjysma e familjeve shqiptare, konkretisht 54.5%, deklarojnë se e kanë të pamundur të mbulojnë një shpenzim të papritur prej 1000 eurosh pa marrë hua ose pa u mbështetur te të tjerët, duke shënuar një përkeqësim të lehtë krahasuar me vitin e kaluar.
Ndërsa Shqipëria dhe Maqedonia e Veriut (48.1%) kryesojnë listën për pamundësinë ekonomike, Kosova ka shënuar një përmirësim surprizues dhe të dukshëm, ku mbi gjysma e popullsisë tashmë deklaron se mund ta përballojë një emergjencë të tillë, nga vetëm 38% që ishte ky nivel në vitin 2024. Në kahun tjetër, Serbia po përjeton një rënie të ndjeshme të sigurisë financiare, ku vetëm një e katërta e të anketuarve ndihen të sigurt, ndërkohë që pjesa tjetër shfaq paqartësi të lartë mbi kursimet e tyre.
Në nivel rajonal, situata mbetet mjaft e brishtë pasi vetëm një e treta e qytetarëve në të gjashtë vendet e Ballkanit Perëndimor ndihen financiarisht të mbrojtur. Ky përkeqësim i perceptimit mbi qëndrueshmërinë ekonomike tregon se presionet e çmimeve dhe pasiguria e vazhdueshme po kufizojnë mirëqenien e familjeve, duke u bërë një ndër shkaqet kryesore që nxit emigrimin e mëtejshëm të popullsisë drejt vendeve më të zhvilluara.
