Familjarët e Ylli Dines, bari 65-vjeçar nga fshati Mezhgoran i Bashkisë Tepelenë, kanë humbur kontaktet me të prej tre ditësh. Pas denoncimit të bërë në polici, forcat e rendit nisën menjëherë kërkimet në zonën ku ai ishte parë për herë të fundit.
Gjatë kontrolleve, në bregun e lumit Vjosë janë gjetur disa sende personale, konkretisht kërraba dhe velenxa, që dyshohet se i përkisnin 65-vjeçarit. Kjo gjetje ka shtuar dyshimet se ai mund të ketë rënë ose të jetë hedhur në ujërat e rrëmbyeshme të lumit.
Për pasojë, kërkimet janë përqendruar në shtratin e lumit Vjosë. Në vendngjarje ndodhen forca të Policisë së Gjirokastrës, të cilat po vijojnë operacionin për gjetjen e trupit të të moshuarit.
