Vasil Palo është shqiptari që ka humbur jetën në Rumani, pas një aksidenti tragjik rrugor ku mbetën të vdekur gjithsej shtatë tifozë ultras të PAOK-ut. Ata ishin nisur drejt Francës për të ndjekur ekipin e tyre të zemrës në një ndeshje të vlefshme për Europa League.
Ngjarja e rëndë ndodhi në zonën e Timișoarës, në një segment rrugor të njohur ndryshe si “autostrada e vdekjes”, për shkak të numrit të lartë të aksidenteve fatale.
Vasil Palo jetonte prej vitesh me familjen e tij në Alexandria të Imathias, në Greqi. Miq të afërt të tij tregojnë se, larg kamerave, Vasili ishte një tifoz i zjarrtë i PAOK-ut dhe ishte prezent pothuajse në çdo ndeshje të ekipit të zemrës. Edhe udhëtimi i fundit drejt Francës kishte të njëjtin qëllim: mbështetjen e skuadrës së tij.
Ndërkohë, Genci Sadiku është shqiptari tjetër emigrant i përfshirë në këtë aksident, i cili rreth orës 14:00 ka mundur të komunikojë për disa sekonda me familjen e tij përmes telefonit. “Nuk e di si jam gjallë, por jam mirë. Do të vij përsëri në shtëpi”, mësohet t’u ketë thënë ai familjarëve, sipas dëshmive të dhëna jashtë kamerave për mediat greke.
