Një lodër pellushi në formën e një kali të kuq, e prodhuar në Kinë, është shndërruar në një fenomen viral për shkak të një defekti të pazakontë në prodhim. Në vend të një buzëqeshjeje të gëzuar, kali doli në treg me një shprehje të trishtuar, ku vrimat e hundës duken si lot që rrjedhin. Gabimi, që fillimisht dukej problematik, e bëri kukullën tërheqëse dhe të dashur për publikun.
Kukulla u prodhua nga kompania Happy Sister në qytetin Yiwu dhe u përhap me shpejtësi në rrjetet sociale kineze, ku përdoruesit e lidhën shprehjen e saj me lodhjen dhe stresin e përditshëm të punës. Shumë e quajtën “kali që qan” një pasqyrim të gjendjes emocionale të punonjësve, duke bërë shaka se ai përfaqëson pamjen e njerëzve gjatë orarit të punës.
Pavarësisht se ishte një gabim, suksesi i lodrës ishte i menjëhershëm, me mijëra porosi çdo ditë dhe interes edhe nga tregjet ndërkombëtare. Kompania rriti prodhimin dhe e ktheu kukullën në simbol të një trendi të ri lodrash “të shëmtuara, por të lezetshme”, duke treguar se edhe një defekt i vogël mund të kthehet në histori suksesi.
