Personi që shfaqet në foto është Vasil Pilo, i riu shqiptar që humbi jetën këtë të martë në aksidentin e rëndë rrugor në Rumani, ku u përfshinë tifozë të ekipit grek PAOK i Selanikut.
Ngjarja tragjike ndodhi në autostradën pranë qytetit Lugoj, ndërsa një furgon me tifozë të PAOK-ut po udhëtonte drejt Francës për të ndjekur ndeshjen kundër Olympique Lyon, e vlefshme për Europa League.
Si pasojë e aksidentit, shtatë persona humbën jetën në vend, ndërsa tre të tjerë mbetën të plagosur rëndë. Mes të plagosurve është edhe një shtetas shqiptar, Genci Sadiku, i cili po merr trajtim mjekësor në spital.
Autoritetet rumune kanë nisur hetimet për të zbardhur shkaqet e aksidentit, ndërsa familjarët, miqtë dhe komuniteti i tifozëve të PAOK-ut janë tronditur nga humbja e rëndë.
