Autoritetet greke kanë arrestuar këtë të martë pronarin dhe dy drejtuesit e fabrikës së biskotave në Trikala, ku një shpërthim tragjik mori jetën e pesë punëtorëve.
Të arrestuarit përballen me akuza serioze, përfshirë vrasje të paqëllimshme, shpërthim, zjarrvënie të qëllimshme dhe lëndime trupore. Ndërkohë, autoritetet kanë nisur hetimet për të përcaktuar shkaqet e shpërthimit dhe po mbledhin provat e para.
Sipas informacioneve fillestare, shpërthimi ndodhi në bodrumin e fabrikës, i cili përdorej si zonë magazinimi. Policia po heton raportet për një erë gazi që ishte ndjerë kohët e fundit, megjithëse rezervuarët e propanit që furnizojnë furrat rezultuan të paprekura. Ekspertët nuk përjashtojnë mundësinë që shpërthimi të ketë ardhur si pasojë e rrjedhjes së një gazi të ndezshëm, por shkaku përfundimtar ende nuk është përcaktuar.
