Presidenti francez, Emmanuel Macron, ka njoftuar se qeveria e tij do të përshpejtojë procesin ligjor për të ndaluar përdorimin e rrjeteve sociale nga fëmijët nën 15 vjeç, me qëllim që kjo masë të hyjë në fuqi para fillimit të vitit të ardhshëm shkollor në shtator.
“Truri i fëmijëve dhe adoleshentëve tanë nuk është për shitje,” tha Macron në një video të publikuar të shtunën nga BFMTV. Ai theksoi se emocionet e tyre nuk duhet të manipulohen nga platformat amerikane apo algoritmet kineze dhe paralajmëroi se përveç ndalimit të rrjeteve sociale, do të ndalohet përdorimi i telefonave celularë në shkollat e mesme.
Kjo iniciativë pasqyron trendin global, ku një numër vendesh perëndimore po hartojnë ligje për të mbrojtur të rinjtë nga ndikimet negative të rrjeteve sociale. Në dhjetor të vitit 2025, Australia miratoi një ligj historik që ndalon personat nën 16 vjeç të kenë llogari në Instagram, TikTok, Facebook dhe platforma të tjera.
Në Francë, nisma po udhëhiqet nga deputetja Laure Miller, e partisë Renaissance të Macronit. Ajo shpjegoi se aktualisht nuk ekziston një verifikim real i moshës dhe se shumë fëmijë mund të regjistrohen në rrjete sociale duke dhënë data lindjeje të rreme. Miller shtoi se përmes zbatimit strikt të Aktit Evropian për Shërbimet Digjitale (DSA), përdoruesit do të duhet të provojnë moshën e tyre reale, duke ndryshuar kështu rrënjësisht mënyrën se si fëmijët aksesojnë këto platforma.
Duke pranuar se gjithmonë mund të ketë mënyra për t’i anashkaluar kufizimet, ajo tha se Franca duhet të “hedhë të paktën hapin e parë” për mbrojtjen e të miturve online.
Përveç Francës, Britania e Madhe po shqyrton gjithashtu masa të ngjashme për të mbrojtur fëmijët në internet, përfshirë ndalimin e rrjeteve sociale për personat nën 16 vjeç.
Ndërkohë, në Australi, pas hyrjes në fuqi të ndalimit, mbi 4.7 milionë llogari të personave nën 16 vjeç janë çaktivizuar ose fshirë, sipas kryeministrit Anthony Albanese. Ai tha se qeveria kishte përgjegjësi të reagojë ndaj dëshirës së prindërve dhe thirrjeve të të rinjve për të kaluar më shumë kohë si fëmijë, pa ndikime negative nga rrjetet sociale.
Shtysa për ndalimin australian erdhi nga libri i psikologut social amerikan Jonathan Haidt, The Anxious Generation, i cili argumenton se rrjetet sociale po dëmtojnë shëndetin mendor të fëmijëve. Libri u bë shkak që kryeministri i Australisë Jugore, Peter Malinauskas, të hartojë një projektligj që më vonë u shndërrua në fushatë federale për mbrojtjen e të miturve në internet.
