Ajo po përgatitet t’i nënshtrohet një ndërhyrjeje të re kirurgjikale në zorrë, e treta brenda këtij muaji janar. Sipas prindërve, gjendja e saj shëndetësore mbetet ende shumë e brishtë për t’u transferuar nga spitali i Zyrihut, ku u dërgua që në orët e para pas tragjedisë në diskotekën e Crans-Montana.
Megjithatë, në mes të një beteje ende të gjatë, ka pasur edhe një moment të madh gëzimi: Elsa Rubino, vajza 15-vjeçare nga Biella që i mbijetoi zjarrit me 60% të trupit të djegur, hapi sytë dhe njohu nënën e saj Isabella dhe babain Lorenzo. Lajmi u përhap fillimisht në rrjetet sociale nga miqtë dhe shokët e saj të shkollës, për t’u konfirmuar më pas edhe nga i ati. Shenjat e lehta të përmirësimit, për të cilat flitej prej ditësh, u bënë më konkrete dhe i shtynë mjekët të ulin nivelin e sedacionit.
“Elsa hapi sytë dhe na njohu. Ndodhi në momentin kur sedacioni ishte ulur”, ka treguar Lorenzo Rubino për Corriere. “Për mua dhe për nënën e saj ishte një emocion i jashtëzakonshëm, i paimagjinueshëm. E dimë se është vetëm një hap shumë i vogël krahasuar me rrugën që kemi përpara. Ajo ende nuk ka zorrë funksionale. Lufta është ende e gjatë.”
Aktualisht, Elsa është në pritje të operacionit të tretë, i cili për momentin është shtyrë për shkak të pranisë së një bakteri. “Ishte një moment i shkurtër, por shumë intensiv. Na tregoi se ishte e vetëdijshme. Por beteja sapo ka filluar,” shpjegon babai. “Prognoza mbetet e rezervuar dhe shumë delikate. Elsa vazhdon të mbahet nën sedacion. Herët e tjera ishte zgjuar dhe kishte qarë; këtë herë, përkundrazi, na njohu vërtet. Është një fazë shumë e rëndësishme, por rruga do të jetë e gjatë dhe e vështirë, dhe ajo po bëhet gjithnjë e më e ndërgjegjshme për këtë.”
Ndërkohë, Liceo Sella dhe i gjithë qyteti i Biellas kanë treguar mbështetje të vazhdueshme për Elsën dhe familjen e saj. Në shkollë, drejtori Gianluca Spagnolo ka aktivizuar një protokoll të posaçëm mbështetjeje psikologjike për shokët e klasës së Elsës, duke ia besuar ndërhyrjen Shoqatës EMDR Italia. Programi parashikon dy ndërhyrje specialistike, tre takime në grup për nxënësit dhe një takim psikoedukativ të dedikuar për të rriturit.
