Syzet e diellit aviator të presidentit francez Emmanuel Macron kanë tërhequr vëmendje të madhe në rrjetet sociale, pasi ai i mbajti gjatë fjalimit të tij në Forumin Ekonomik Botëror në Davos, ku kritikoi presidentin amerikan Donald Trump për qëndrimet ndaj Grenlandës. Pamja e Macron, me syze të errëta dhe reflektuese në një ambient të mbyllur, nxiti debate dhe krahasime me stilin “Top Gun”, duke u kthyer shpejt në temë virale online.
Zyra e presidentit francez sqaroi se vendimi për të mbajtur syze dielli gjatë fjalimit ishte për arsye shëndetësore, konkretisht për të mbrojtur sytë për shkak të një ene gjaku të shpërthyer. Megjithatë, kompania franceze e syzeve luksoze Henry Jullien bëri të ditur se modeli i përdorur nga Macron ishte një dhuratë e marrë prej tyre në vitin 2024, edhe pse presidenca nuk e konfirmoi zyrtarisht markën. Sipas Reuters, reagimet në rrjet varionin nga lavdërime për pamjen e tij, deri te kritika dhe spekulime mbi shëndetin e presidentit.
Memet dhe ironitë u përhapën me shpejtësi, përfshirë një meme të titulluar “Duel in Davos”, e stiluar si parodi e Top Gun, ku Macron dhe Trump shfaqeshin përballë njëri-tjetrit me kostume fluturimi. Edhe media italiane Libero e quajti Macron një “mburrje të madhe”, ndërsa ministri francez për Çështjet Evropiane, Benjamin Haddad, u përfshi në humor duke postuar një meme tjetër virale. Ndërkohë, interesimi për syzet Henry Jullien u rrit ndjeshëm globalisht, me kërkimet që arritën kulmin të mërkurën në mëngjes, ndërsa kompania konfirmoi se modeli Pacific S 01, me çmim 659 euro, po gjeneron një numër jashtëzakonisht të lartë telefonatash dhe interesimi.
