Blerina Gjylameti është emëruar në krye të Autoritetit Kombëtar të Ushqimit (AKU). Ish-deputetja e Partisë Socialiste, e cila nuk arriti të sigurojë një mandat në Kuvend për vetëm 20 vota më pak se Olta Xhaçka, do të ketë tashmë përgjegjësinë për mbikëqyrjen, kontrollin dhe garantimin e cilësisë e sigurisë ushqimore në vend.
Një tjetër mundësi për rikthimin e saj në Parlament ishin zgjedhjet e pjesshme për Bashkinë e Tiranës, të cilat fillimisht u dekretuan dhe më pas u anuluan. Megjithatë, vendimi përfundimtar i Gjykatës Kushtetuese bëri që Gjylameti të mbetet jashtë Kuvendit.
Ndërkohë, kryeministri ka paralajmëruar një qasje më të fortë ndaj kontrollit ushqimor, duke theksuar se, ashtu si në vendet e Bashkimit Europian, edhe në Shqipëri produktet që nuk përmbushin standardet e sigurisë mund të bllokohen. Sipas tij, vendi duhet të funksionojë me të njëjtat kritere, çka sinjalizon një fazë më të ashpër kontrollesh, të paktën në aspektin formal.
