Një banor nga Fushë-Kruja ka denoncuar një problem serioz që vijon prej më shumë se katër muajsh, pa asnjë zgjidhje nga institucionet përgjegjëse.
Sipas denoncuesit, gjatë punimeve në rrugë, punëtorët kanë çarë tubin e ujit, duke shkaktuar rrjedhje të vazhdueshme. Që prej asaj kohe, problemi nuk është rregulluar dhe situata është përkeqësuar dita-ditës.
Pavarësisht ankesave të përsëritura, bashkia nuk ka marrë asnjë masë për riparimin e dëmit. Në mes të rrugës ndodhet edhe një gropë e hapur, e cila përbën rrezik real për këmbësorët dhe automjetet, veçanërisht gjatë natës ose në kushte të këqija moti.
Banorët shprehen të revoltuar nga neglizhenca e institucioneve, ndërsa humbja e ujit të pijshëm vijon pa ndërprerje. Ata kërkojnë ndërhyrje të menjëhershme për rregullimin e tubacionit dhe mbylljen e gropës, për të garantuar sigurinë dhe shërbimin bazë të ujit.
