Policia rrugore ka rënë sërish në lupën e qytetarëve, të cilët e akuzojnë atë për vendosjen e gjobave jo mbi bazën e shkeljeve reale, por për të plotësuar një numër të paracaktuar ndëshkimesh.
Në një mesazh drejtuar redaksisë sonë, një qytetar shpreh shqetësimin se efektivët e policisë, në momentet kur nuk arrijnë të përmbushin kuotën e gjobave dhe “arka është bosh”, u drejtohen kryesisht furgonëve dhe mjeteve të transportit të punonjësve apo nxënësve për të plotësuar shifrat.
Sipas qytetarit, kjo praktikë është bërë shqetësuese, pasi për të përmbushur urdhrat e eprorëve, policët ndalojnë dhe vonojnë nxënësit e shkollave, si edhe punonjësit e kompanive të ndryshme, duke krijuar kaos dhe pakënaqësi të përgjithshme.
Ai shprehet i revoltuar, duke theksuar se në shumë raste ndalimet duken arbitrare dhe jo të bazuara në shkelje të qarta të rregullave të qarkullimit rrugor.
Në këtë situatë, Policia e Shtetit, ajo rrugore dhe bashkiake, sipas perceptimit të qytetarëve, duket se kohët e fundit ka humbur ndjeshëm besimin e publikut, duke u përballur me kritika të forta për mënyrën e ushtrimit të detyrës dhe marrëdhënien me qytetarët.
Denocimi i qytetarit:
Përshëndetje, sa herë boshatiset arka e shtetit dalin në aksion dhe ndalojnë furgonë me nxënës shkolle palidhje, fëmijët dhe personelet e kompanive sa të plotësojnë gjobbat pa e diskutuar fare. Nuk merren me gjëra serioze.
