Një aksident i rëndë rrugor ka ndodhur gjatë pasdites së sotme në aksin Lezhë-Laç, në afërsi të urës së Milotit.
Përplasja e fortë mes një autoveture dhe një furgoni ka shkaktuar plagosjen e pesë personave, tre prej të cilëve raportohen në gjendje të rëndë për jetën.
Menjëherë pas përplasjes, në vendngjarje kanë mbërritur forcat e policisë dhe dy autoambulanca. Të plagosurit janë transportuar me urgjencë drejt Spitalit të Traumës në Tiranë për të marrë ndihmë të specializuar mjekësore.
Gjendja shëndetësore e disa prej të lënduarve mbetet e rëndë, ndërsa autoritetet po punojnë për zbardhjen e shkaqeve dhe rrethanave të aksidentit.
