Autoritetet italiane kanë arrestuar sërish një shtetas shqiptar 42-vjeçar, i cili kishte hyrë ilegalisht në territorin italian, duke shkelur një urdhër dëbimi pesëvjeçar. Sipas mediave italiane, arrestimi u krye në orët e mëngjesit të datës 15 janar, kur oficerët e policisë e konstatuan 42-vjeçarin brenda një automjeti tip “Mercedes Benz C-Class”.
Nga verifikimet rezultoi se ai ishte subjekt i një urdhri dëbimi me ndalim rihyrjeje në Itali për një periudhë pesëvjeçare, i lëshuar në gusht të vitit 2021 nga Prefektura e Venedikut në bashkëpunim me Selinë Qendrore të Policisë. Pavarësisht këtij vendimi, shqiptari kishte arritur të rikthehej në mënyrë të paligjshme në vend.
Pas arrestimit, 42-vjeçari u vendos në arrest shtëpiak dhe u shoqërua në banesën e tij në Supino. Ai pritet të dalë përpara Gjykatës së Frosinones, ku do të përballet me akuzat për shkelje të ligjit të imigracionit.
