Fermerët e zonës së Myzeqesë po përballen këtë fillimviti me dëme të paprecedenta në kulturat bujqësore. Përmbytjet e fundit kanë shkaktuar humbje të konsiderueshme, ndërsa ngricat e ditëve të para të vitit kanë dëmtuar rëndë prodhimin, edhe në tokat që shpëtuan nga uji.
Një prej fermerëve më të prekur është Fatjon Asllani nga Zharrëza, i cili është detyruar të asgjësojë të gjithë prodhimin e domateve në sera për shkak të ngricave. Probleme të ngjashme raportohen edhe në Frakull, ku fermerët që kultivojnë luleshtrydhe dhe tranguj në sera kanë pësuar dëme të konsiderueshme.
Fermerët e zonës shprehin shqetësim dhe shpresojnë në ndërhyrjen e shtetit për të lehtësuar rimëkëmbjen e aktivitetit bujqësor dhe rimbjelljen e tokave të dëmtuara.
