Gjykata e Posaçme kundër Korrupsionit dhe Krimit të Organizuar ka shpallur fajtor avokatin Besart Logu, duke e dënuar me 2 vite burg për veprën penale të marrjes së ryshfetit me qëllim ndikimin në vendimmarrjen e organeve të drejtësisë.
Sipas vendimit të GJKKO-së, dënimi me burg është konvertuar në 2 vite e 8 muaj shërbim prove, ndërsa Logut i është hequr e drejta për të ushtruar profesionin e avokatit për 9 muaj.
Hetimet e Prokurorisë së Posaçme (SPAK) tregojnë se avokati ka marrë 8 mijë euro nga një shtetas italian i arrestuar, duke premtuar se do të ndërhynte te prokurori, gjyqtari dhe ekspertët e çështjes për të ndikuar në vendimin penal ndaj tij. SPAK thekson se kjo shumë nuk ishte pagesë për shërbime ligjore, por ryshfet i mirëfilltë, me qëllim lirimin e të arrestuarit, i cili akuzohet për skema mashtruese me TVSH dhe evazion fiskal.
Ky rast hedh dritë mbi dobësitë serioze të sistemit të drejtësisë dhe lë shijen e një ndëshkimi simbolik, duke ngjallur shqetësime se korrupsioni mund të mbetet ende i paprekur për ata që kanë lidhje dhe para për të blerë drejtësinë.
