Karabinierët e Raguzës kanë arrestuar një shtetas shqiptar 29-vjeçar, i dyshuar për ushtrim dhune në familje, pas një episodi të rëndë të ndodhur në banesën ku ai bashkëjetonte me partneren e tij.
Efektivët ndërhynë me urgjencë për të parandaluar një përshkallëzim të mëtejshëm të dhunës në familje. Grindja mes dy bashkëjetuesve, e nisur për arsye të parëndësishme, u përshkallëzua fillimisht në ofendime verbale dhe më pas në dhunë fizike, ku burri goditi partneren e tij 33-vjeçare në fytyrë dhe në krahë, në prani të fëmijëve të mitur të saj.
Sipas mediave italiane, telefonata në numrin e emergjencës 112 rezultoi vendimtare. Operatorët konstatuan menjëherë gjendjen e rënduar emocionale të një vajze të re në anën tjetër të linjës, çka u mundësoi forcave të rendit të mbërrinin shpejt në vendngjarje, ndërkohë që konflikti ishte ende në zhvillim. Pasi hynë në banesë, karabinierët ndanë menjëherë çiftin dhe rindërtuan dinamikën e ngjarjes.
Duke marrë parasysh precedentët dhe historikun e sjelljes së dhunshme të 29-vjeçarit, si dhe ndërhyrjet e mëparshme të policisë, autoritetet vendosën arrestimin e tij me akuzën e dhunës në familje.
Pas kryerjes së procedurave ligjore, i arrestuari u dërgua në burgun e Raguzës, ku ndodhet në dispozicion të autoriteteve gjyqësore.
