Altin Ndoci, i dyshuar si vrasës me pagesë, për të cilin Prokuroria pretendon se disponon prova për dy ngjarje kriminale me katër viktima, si dhe për një sërë krimesh të tjera të rënda, i është shtuar listës së gjatë të personave më të kërkuar nga drejtësia shqiptare. Krahas tij, dhjetëra individë të tjerë të konsideruar bosë të krimit të organizuar vijojnë të mbeten në arrati, edhe pse janë shpallur në kërkim prej vitesh.
Ndoci, 38 vjeç, ishte arrestuar fillimisht në vitin 2020 dhe përballet me tetë akuza penale. Ai u arratis nga Spitali i Durrësit të martën, më 13 janar, në rrethana që ngjasojnë me një skenar filmi. Arratisja dyshohet se ishte e mirëorganizuar, me një automjet që e priste jashtë ambientit spitalor, ndërsa reagimi i strukturave policore duket se ka qenë i pamjaftueshëm, pavarësisht pranisë së kamerave të shumta të sigurisë në zonë, të cilat teorikisht do të mundësonin ndjekjen e gjurmëve të tij.
Sipas akuzës, Ndoci ka qenë ekzekutori më 29 dhjetor 2018, kur një atentat i organizuar nga grupi kriminal i vëllezërve Çopja në Bradashesh të Elbasanit la të vrarë Endrit Alibejn, Arben Dylgjerin dhe shtetasin turk Erdal Duranay. Ai akuzohet për të njëjtin rol edhe më 1 korrik 2019, në fshatin Broshkë, ku u vra Klevin Baho dhe u plagos Aldo Baho. Më 16 janar 2020, Ndoci dyshohet se qëlloi për të vrarë Kei Pikun në Elbasan, i cili arriti të mbijetojë, megjithëse i plagosur. Po ashtu, ai akuzohet se ka bashkëpunuar në organizimin e dy atentateve të tjera në periudhën nëntor 2019, janar 2020, si dhe se ka qenë pjesë e grupit që realizoi grabitjen e furgonit të blinduar në Aeroportin Ndërkombëtar të Rinasit.
Zbardhja e këtyre ngjarjeve lidhet ngushtë me sekuestrimin nga autoritetet franceze të serverëve të Sky ECC, një platformë komunikimi të enkriptuar e përdorur gjerësisht nga bota e krimit, me bindjen se ishte e papërgjueshme. Prokuroria e Posaçme ka shfrytëzuar në mënyrë efektive provat e siguruara nga Franca, duke çuar në zbulimin e një numri të madh krimesh të rënda, nga vrasjet dhe trafiku i drogës, te korrupsioni në nivele të ndryshme të shtetit.
Megjithatë, pavarësisht ngritjes së akuzave dhe lëshimit të urdhërarresteve nga gjykatat, shumë prej personazheve kryesorë të dosjeve të Sky ECC vijojnë të jenë të lirë dhe të paarritshëm për drejtësinë shqiptare, ndërsa dyshohet se janë ende në gjendje të koordinojnë veprimtari kriminale.
Hajdar Bako, alias Hajdar Çopja, konsiderohet si një nga dy drejtuesit kryesorë të bandës Çopja, e dyshuar për porositjen e gjashtë vrasjeve. Ai ndodhet në arrati dhe vendndodhja e tij mbetet e panjohur.
Talo Çela, 54 vjeç, i cilësuar si organizatori kryesor i vrasjeve për llogari të vëllezërve Çopja, dyshohet se ka pasur rol kyç si në ekzekutime ashtu edhe në koordinimin e grupit të armatosur gjatë konfliktit të përgjakshëm me bandën rivale të vëllezërve Alibej. Brenda një periudhe trevjeçare, nga ky konflikt humbën jetën rreth një duzinë personash nga të dyja palët. Çela është në arrati, ndërsa të dhëna indirekte sugjerojnë se një rrjet apartamentesh të blera me identitete të rreme shërben si strehë e sigurt për të.
Në arrati ndodhet edhe Suel Çela, 37 vjeç, drejtues i një bande tjetër kriminale me bazë në Elbasan. I shpallur në kërkim që në vitin 2020, ai përballet me nëntë akuza penale, përfshirë vrasje të mbetur në tentativë dhe dy episode të trafikut ndërkombëtar të drogës me një sasi totale prej 1 376 kilogramësh, me vlerë tregu rreth 110 milionë euro. Grupi Çela dyshohet se kontrollon territorin përmes një rrjeti të gjerë kamerash sigurie, të përdorura për monitorim të vazhdueshëm dhe për të parandaluar veprimet e rivalëve apo ndërhyrjet e policisë.
Në veri të vendit, Altin Hajri, i kërkuar për vrasje, ndodhet në arrati që prej vitit 2020. Ai akuzohet gjithashtu për korrupsion të ish-deputetit socialist Jurgis Çyrbja, të cilit i ka siguruar vota në këmbim të informacionit sekret policor, çka dyshohet se ka ndihmuar Hajrin t’i shmanget arrestimit.
Ish-deputeti socialist Arben Ndoka konsiderohet si një nga figurat më të larta të lidhura me botën e krimit që ndodhet aktualisht në arrati. Ndoka, 51 vjeç, akuzohet për vrasje të mbetur në tentativë në kuadër të një grupi të strukturuar kriminal dhe u shpall në kërkim në korrik 2024, si pjesë e një dosjeje të madhe që përfshin shtatë banda kriminale.
Ndërkohë, Durim Bami, i akuzuar për vrasje të mbetur në tentativë, është ndaluar në Dubai, por ende mbetet e paqartë nëse do të ekstradohet drejt Shqipërisë. Ibrahim Lici, fantazma i dyshuar për vrasje dhe i shpallur në kërkim që në vitin 2019, njihet si drejtues i një grupi kriminal të fuqishëm në Shkodër.
Pavarësisht numrit të lartë të bosëve të krimit në arrati, Policia e Shtetit nuk duket se ka ndërmarrë masa të dukshme shtesë për kapjen e tyre, siç do të ishte shpallja e shpërblimeve për informacion mbi vendndodhjen e tyre. Seksioni përkatës në faqen zyrtare të Policisë së Shtetit për personat në kërkim rezulton aktualisht jashtë funksioni.
