Inflacioni bazë e mbylli vitin 2025 në rritje, duke arritur në 3.03% në dhjetor, nga 2.5% një vit më parë dhe 2.98% në nëntor. Kjo shënon rritjen e parë vjetore që prej 2022 dhe tregon forcimin e presioneve inflacioniste nga ekonomia e brendshme.
Paralelisht, inflacioni bazë neto u rrit në 3.47%, nga 2.21% në 2024, ndërsa inflacioni që përjashton ushqimet dhe energjinë arriti në 3.32%. Në kontrast, inflacioni zyrtar mbeti relativisht i ulët, në 2.3%, i ndikuar nga inflacioni i ulët i importuar.
Sipas Bankës së Shqipërisë, rritja e çmimeve të qirasë ka qenë faktori kryesor pas rritjes së inflacionit bazë, ndërsa efekti i saj pritet të jetë i përkohshëm. Banka vlerëson se inflacioni do të kthehet në objektivin 3% gjatë tremujorit të dytë të vitit 2026.
Të dhënat tregojnë se presionet inflacioniste afatgjata janë dukshëm më të forta sesa sugjeron inflacioni i përgjithshëm, duke reflektuar rritjen e çmimeve të shërbimeve dhe të kostove të brendshme. Banka e Shqipërisë vlerëson se balanca e presioneve afatmesme po i afrohet gradualisht objektivit të inflacionit, ndërsa stabilizimi i çmimeve pritet të mbështetet nga normalizimi i tregut të qirave dhe nga frenimi i faktorëve të përkohshëm.
