Departamenti Amerikan i Shtetit (DASH) ka publikuar një udhëzim të ri që pritet të shkaktojë debate të forta, duke pezulluar vizat e emigrantëve për 75 vende, mes të cilave bën pjesë edhe Shqipëria. Sipas dokumentit zyrtar, fokusi kryesor i zyrtarëve konsullorë do të jetë parandalimi i personave që mund të kthehen në "barrë publike" për sistemin amerikan.
Detaji që ka rënë më shumë në sy në këtë rregullore lidhet me gjendjen fizike të aplikantëve. Sipas udhëzimeve:
Individët mbi peshë: Personat që konsiderohen mbi peshë janë drejtpërdrejt të prekur nga refuzimi i vizës, pasi mund të shihen si barrë potenciale për sistemin shëndetësor.
Të moshuarit: Kjo kategori është gjithashtu në listën e personave që rrezikojnë të mbeten jashtë SHBA-së.
Histori me ndihmën publike: Do të refuzohen ata që kanë marrë më parë ndihmë financiare nga qeveria ose që kanë pasur qëndrime të mëparshme në spital.
Zëdhënësi i DASH, Tommy Piggott, ka qenë i prerë në deklaratën e tij, duke theksuar se autoriteti i Departamentit do të përdoret për të skualifikuar emigrantët që do të shfrytëzonin bujarinë e popullit amerikan. Ai i cilësoi këta aplikantë si "emigrantë potencialë të papërshtatshëm".
Ky pezullim i papritur do të hyjë në fuqi më 21 janar dhe nuk ka një afat të caktuar se kur do të përfundojë shqyrtimi i këtyre procedurave të reja.
