‘Pas pilafit’ forcat operacionale kryejnë kontrolle në qelinë e ‘krahut të armatosur’ të Çopjave

Pas arratisjes së Altin Ndocit nga Spitali Rajonal i Durrësit, autoritetet kanë intensifikuar veprimet në të gjithë sistemin e burgjeve. Forcat Operacionale të Policisë së Burgjeve janë nisur nga Tirana drejt Durrësit, ku kanë ndërmarrë kontrolle të detajuara në institucionin e paraburgimit ku Ndoci mbahej, si dhe po mbledhin informacione që mund të ndihmojnë në zbardhjen e plotë të ngjarjes.

Burime zyrtare bëjnë me dije se operacioni synon verifikimin e masave të sigurisë, si edhe identifikimin e personave që ndodheshin në të njëjtën dhomë me Ndocin, për të përcaktuar nëse dikush ka pasur dijeni për planin e arratisjes apo ka ofruar ndihmë, qoftë drejtpërdrejt apo në mënyrë të tërthortë.

Kontrollet përfshijnë:

• verifikimin e komunikimeve dhe kontakteve të fundit të paraburgosurit;
• analizimin e materialeve të gjetura në qeli ose në ambientet përkatëse, që mund të tregojnë përgatitje për arratisje;
• shqyrtimin e orareve, regjistrave dhe pamjeve të kamerave të sigurisë për të ndjekur lëvizjet brenda institucionit;
• intervistimin e stafit dhe të paraburgosurve të tjerë, për të zbuluar nëse kanë vënë re apo dyshuar për veprimet e Ndocit.

Ndoci u arratis mesditën e sotëm, pasi goditi një efektiv policie në ambientet e spitalit dhe u largua me shpejtësi nga kati i tretë. Dyshohet se ai është ndihmuar nga një automjet tip “Audi A7” që e priste jashtë spitalit. Deri më tani, ai nuk është lokalizuar nga autoritetet.

Ky zhvillim vjen njëkohësisht me pezullimin e drejtuesve të Burgut të Durrësit, përfshirë drejtorin dhe shefin e policisë së burgut, deri në përfundimin e hetimeve të brendshme administrative.