Prurjet e shumta të lumit Seman dhe çarja e argjinaturës në disa segmente kanë shkaktuar përmbytje gjatë natës në tokat bujqësore dhe drejt zonave të banuara. Si pasojë, rreth 20 banesa në zonën e Dernenasit, në njësinë administrative Libofshë, janë përmbytur, ndërsa qindra hektarë tokë bujqësore kanë mbetur nën ujë.
Banorët e zonës shprehen të shqetësuar, pasi sipas tyre prurjet e lumit vijojnë ende me intensitet të lartë, duke rrezikuar përkeqësimin e situatës. Ata kërkojnë ndërhyrje të menjëhershme për të shmangur dëme të tjera në banesa dhe kultura bujqësore.
Ndërkohë, në terren kanë mbërritur eskavatorë dhe mjete të rënda, të cilat po punojnë intensivisht për stabilizimin e argjinaturës dhe reduktimin e dëmeve. Autoritetet lokale janë në monitorim të vazhdueshëm të situatës dhe kanë bërë thirrje për vigjilencë nga ana e banorëve.
