Tre fëmijë të mitur janë marrë në mbrojtje nga Shërbimi Social në Durrës, pas një rasti të rëndë neglizhence të raportuar nga fqinjët në zonën e Plazhit. Sipas të dhënave paraprake, fëmijët dyshohet se ishin lënë vetëm në banesë prej disa ditësh nga nëna e tyre, 33-vjeçarja Blerina B.
Ngjarja u sinjalizua pasi fqinjët dëgjuan të qarat e fëmijëve dhe ngritën shqetësimin pranë autoriteteve. Pas raportimit, Policia e Durrësit, në bashkëpunim me Zyrën e Mbrojtjes së Fëmijëve, ndërhyri menjëherë duke i marrë të miturit nën mbrojtje.
Sipas rrëfimeve të fëmijëve, ata nuk kishin shkuar në shkollë prej rreth një muaji, ndërsa tre ditët e fundit kishin mbetur pa ushqim. Siç shihet dhe në video, banesa ku ata ndodheshin rezulton pa asnjë përkujdesje.
Fillimisht, tre fëmijët u dërguan në Spitalin Rajonal të Durrësit për kontrolle mjekësore, ku ndodhen nën kujdesin e mjekëve. Më pas, ata janë sistemuar pranë Qendrës së Mbrojtjes së Fëmijëve, ku iu është siguruar ushqimi, veshmbathja dhe asistenca e nevojshme.
Policia ka nisur procedim penal ndaj shtetases Blerina B., për veprën penale “Keqtrajtimi i të miturve”, ndërsa materialet procedurale i janë referuar Prokurorisë së Durrësit për veprime të mëtejshme.
Autoritetet bëjnë me dije se rasti është në ndjekje dhe po trajtohet me prioritet, ndërsa synimi kryesor mbetet garantimi i sigurisë dhe mirëqenies së fëmijëve.
