Kompania zvicerane MABCO Constructions, aksionere mazhoritare me 98% të kapitalit në shoqërinë Vlora International Airport (VIA), ka dalë publikisht me një shqetësim serioz lidhur me ecurinë e projektit të Aeroportit Ndërkombëtar të Vlorës, duke pretenduar se ky investim strategjik po përballet me bllokime të rënda juridike dhe operacionale.
Në një deklaratë drejtuar institucioneve shqiptare dhe opinionit publik, MABCO shprehet se vendime të ndryshme dhe kontradiktore të gjykatave, si edhe veprime administrative të njëanshme, kanë krijuar një situatë që sipas saj cenon sigurinë juridike dhe paralizon vendimmarrjen e aksionerit mazhoritar.
Sipas kompanisë, aksioneri minoritar, i cili zotëron vetëm 2% të kapitalit të shoqërisë, ka arritur të ndikojë në mënyrë disproporcionale mbi funksionimin e projektit, duke bllokuar procese vendimmarrëse dhe duke penguar vijimin normal të punimeve në terren. MABCO e konsideron këtë situatë si një precedent shqetësues për klimën e investimeve në Shqipëri, pasi, sipas saj, vullneti i një pakice po përdoret për të neutralizuar të drejtat e shumicës dërrmuese të investimit.
Në deklaratë ngrihen gjithashtu pretendime për mungesë transparence në disa procese gjyqësore, ku, sipas MABCO-s, pala që përfaqëson pjesën më të madhe të kapitalit nuk është njoftuar apo thirrur në seanca, duke cenuar parimin e procesit të rregullt ligjor.
Përtej aspektit juridik, kompania zvicerane flet edhe për bllokime konkrete në terren, duke përmendur emërime të njëanshme drejtuese, përdorim të raporteve teknike të kontestuara dhe vonesa të qëllimshme në përfundimin e elementëve kyç të infrastrukturës së aeroportit, si terminali, kulla e vrojtimit dhe furnizimi me energji elektrike.
Në këtë kontekst, MABCO i bën thirrje Inspektoratit të Lartë të Drejtësisë dhe institucioneve të tjera mbikëqyrëse që të ndërhyjnë për të verifikuar ligjshmërinë e procedurave të ndjekura, ndërsa paralajmëron se do të ndjekë të gjitha rrugët ligjore, brenda dhe jashtë vendit, për të mbrojtur investimin e saj.
DEKLARATË E PLOTË PËR SHTYP NGA MABCO:
MABCO denoncon pengmarrjen juridike të Aeroportit Ndërkombëtar të Vlorës Lugano/Tiranë, 09.01.2026
Kompania zvicerane MABCO, zotëruese e 98% të aksioneve të shoqërisë VIA (Vlora International Airport), ngre alarmin për një situatë të paprecedentë juridike dhe operacionale që po rrezikon seriozisht përfundimin e këtij investimi strategjik kombëtar.
Në një rast që sfidon çdo parim të sigurisë juridike dhe të drejtës tregtare, një aksioner i minorancës që përfaqëson vetëm 2% të kapitalit, ka arritur të bllokojë vendimmarrjen e shumicës dërrmuese dhe të paralizojë ecurinë e punimeve.
Asimetria Juridike dhe Shkelja e Procesit të Rregullt
MABCO vëren me shqetësim një sërë vendimesh kontradiktore nga sistemi gjyqësor, të cilat duket se po përdoren si mjet për bllokimin e investimit:
• Përmbysja e Hierarkisë Gjyqësore: Megjithëse Gjykata e Apelit rrëzoi vendimin që pezullonte të drejtën e votës së MABCO-s, vetëm një ditë më pas, një tjetër vendim i Shkallës së Parë ka rikthyer të njëjtin kufizim mbi bazën e kërkesave identike të aksionerit 2%.
• Mungesa e Transparencës: Një sërë seancash dhe vendimesh janë zhvilluar pa njoftuar dhe pa thirrur palën mazhoritare (MABCO).
• Paradoksi i Vendimmarrjes: Është juridikisht e pajustifikueshme që vullneti i 2% të aksioneve të asgjësojë të drejtat pronësore të 98% të investimit.
Sabotimi Operacional i Projektit
MABCO denoncon veprime të njëanshme nga aksioneri i minorancës, z. Valon Ademi (përmes “2A Group”):
Thirrje për Ndërhyrje Urgjente
MABCO i drejtohet publikisht ILD-së dhe institucioneve mbikëqyrëse për të hetuar procedurat gjyqësore dhe për të parandaluar vonesa artificiale në një projekt strategjik për vendin.
MABCO do të ndjekë të gjitha rrugët ligjore, kombëtare dhe ndërkombëtare, për të mbrojtur integritetin e investimit të saj në Shqipëri.
