Në vijim të zjarrit të madh që përfshiu tregun e rrobave pranë rrugës “5 Maji” në Tiranë, një qytetar nga vendngjarja ka dërguar një video në redaksinë e JOQ Albania, ku u bën thirrje banorëve të zonës të tregojnë kujdes të shtuar ndaj tymit të dendur.
Në pamjet e mbërritura, qytetari shprehet i shqetësuar për toksinat që, sipas tij, janë çliruar në ajër si pasojë e djegies së materialeve të ndryshme, kryesisht rroba dhe produkte të tjera tregtare. Ai paralajmëron se tymi i zi dhe i rëndë mund të jetë i rrezikshëm për shëndetin, veçanërisht për fëmijët, të moshuarit dhe personat me probleme të frymëmarrjes.
Tymi i dendur ka mbuluar një pjesë të konsiderueshme të zonës, ndërsa era e rëndë është ndjerë edhe në lagjet përreth, duke shkaktuar shqetësim te banorët. Qytetari u bën apel familjeve të mbajnë dritaret të mbyllura dhe të shmangin daljet e panevojshme, deri në përmirësimin e situatës.
Ndërkohë, forcat zjarrfikëse vijojnë punën për shuarjen e plotë të flakëve, ndërsa autoritetet ende nuk kanë dhënë një njoftim zyrtar lidhur me ndikimin e tymit në shëndetin publik dhe masat që pritet të merren. Situata mbetet në zhvillim.
