Një situatë kritike është paraqitur edhe në zonën e Currilave në Durrës! Reshjet e dendura të shiut gjatë orëve të fundit kanë shkaktuar një rëshqitje masive të dherave në pjesën e sipërme të kodrës, duke nxjerrë jashtë funksionit aksin rrugor kur ngjitesh në Kodër.
Siç shihet nga fotot e siguruara për JOQ, asfalti është "fryrë" dhe çarë tej për tej, teksa masa e dheut nën të ka lëvizur duke krijuar valëzime të rrezikshme në rrugë.
Shiu i tepërt ka ngopur shtresat argjilore të kodrës, duke rritur presionin hidrostatik nëntokë. Kjo ka bërë që toka të "fryhet" nga poshtë, duke shkatërruar strukturën e rrugës dhe duke e bërë kalimin e mjeteve thuajse të pamundur dhe ekstremisht të rrezikshëm.
Rruga është e pasigurt! Çarjet e thella tregojnë se toka poshtë asfaltit është në lëvizje të vazhdueshme. Ekziston frika se një pjesë e kodrës mund të shkëputet plotësisht, duke rrezikuar jo vetëm infrastrukturën, por edhe objektet përreth.
Drejtuesit e mjeteve dhe këmbësorët këshillohen të shmangin këtë segment deri në një ndërhyrje nga Emergjencat Civile dhe Bashkia Durrës. Kalimi mbi këto çarje mund të provokojë shembje të papritura të rrugës.
