Gjashtë persona, përfshirë tre fëmijë të vegjël, janë plagosur në një aksident të rëndë mëngjesin e 7 janarit në Liedermatte, afër Waldshut-Tingen në Gjermani, pranë kufirit me Zvicrën. Familja shqiptare po kthehej nga Kosova kur makina e tyre u përplas me një kamion.
Të aksidentuarit janë nga fshati Ratkoc i Rahovecit, ndërsa fëmijët e moshave nga 5 muajsh deri në 3 vjeç u transportuan me helikopterë shpëtimi. Shkalla e lëndimeve ende nuk është e qartë, por disa prej pasagjerëve kanë marrë plagë të rënda dhe njëri mbeti i bllokuar brenda makinës, duke kërkuar ndërhyrjen e zjarrfikësve.
Sipas policisë gjermane, shkaku i aksidentit nuk është i qartë dhe hetimet janë në vazhdim. Autoritetet përdorën helikopterë shpëtimi për të evakuuar të lënduarit dhe për të siguruar trajtimin e menjëhershëm mjekësor. Familja ndodhej vetëm pak kilometra larg destinacionit të tyre kur ndodhi përplasja.
