Banorët e fshatit Bishqem, në njësinë administrative Pajovë të bashkisë Peqin, denoncojnë një problem serioz mjedisor që po zgjat prej vitesh. Sipas tyre, kanalet e zonës janë të mbushura me mbeturina dhe ujëra të ndotura, duke krijuar rrezik për shëndetin dhe jetesën e komunitetit. Ata shprehen se situata është përkeqësuar dhe po kthehet në një katastrofë mjedisore.
Qytetarët thonë se prej më shumë se 15 vitesh nuk është ndërhyrë për pastrimin e kanaleve dhe se mungesa e vëmendjes nga institucionet ka sjellë pasoja të rënda, sidomos gjatë stinës së verës dhe reshjeve. Era e rëndë dhe ndotja janë bërë të padurueshme, ndërsa banorët ndihen të braktisur dhe të pambrojtur.
Banorët i bëjnë thirrje bashkisë Peqin dhe kryetarit të saj, Bukurosh Maqi, që të ndërmarrin masa të menjëhershme për zgjidhjen e këtij problemi. Ata kërkojnë pastrim të kanaleve dhe një plan afatgjatë për të shmangur përsëritjen e situatës, duke theksuar se shëndeti dhe mirëqenia e komunitetit nuk mund të neglizhohen më.
