Reshjet e dendura të borës dhe temperaturat e ulëta kanë shkaktuar probleme serioze në transport në disa vende të Evropës, duke lënë pas gjashtë viktima dhe kaos në udhëtime. Autoritetet raportojnë se incidentet e lidhura me motin e keq kanë prekur veçanërisht Francën, Ballkanin dhe Evropën Veriore.
Në Francë, pesë persona humbën jetën në aksidente të ndryshme rrugore, tre prej tyre në rajonin Landes dhe dy në zonën e Parisit, si pasojë e rrugëve të mbuluara me akull dhe borë. Një aksident fatal ndodhi pas përplasjes së një automjeti me një kamion të rëndë, ndërsa një tjetër viktimë humbi jetën pasi një taksi përfundoi në lumin Marne. Ndërkohë, në Sarajevë, një grua u vra pasi mbi 40 centimetra borë mbuluan kryeqytetin e Bosnjës.
Moti i keq ka shkaktuar gjithashtu anulimin e qindra fluturimeve në të gjithë kontinentin. Aeroportet e Parisit dhe Amsterdamit janë ndër më të prekurit, me mijëra pasagjerë të bllokuar. Vetëm në aeroportin Schiphol të Amsterdamit u anuluan mbi 400 fluturime, kryesisht të kompanisë KLM, ndërsa anulime dhe vonesa të mëdha u raportuan edhe në shërbimet hekurudhore.
Autoritetet u kanë bërë thirrje qytetarëve të shmangin udhëtimet e panevojshme, ndërsa paralajmërohet se kushtet e vështira të motit pritet të vazhdojnë edhe në ditët në vijim.
