Forcat e sigurisë në Iran janë përplasur me protestues në Pazarin e Madh të Teheranit, një nga qendrat historike më të rëndësishme ekonomike dhe politike të vendit, ndërsa demonstratat kundër krizës ekonomike vijojnë të përshkallëzohen. Sipas aktivistëve jashtë vendit, të paktën 36 persona kanë humbur jetën, ndërsa mbi 1,200 të tjerë janë arrestuar gjatë protestave të ditëve të fundit.
Sipas dëshmitarëve, protestuesit, të revoltuar nga rënia e fortë e ekonomisë dhe zhvlerësimi i monedhës kombëtare, zhvilluan një protestë duke qëndruar ulur në një nga korridoret e Pazarit të Madh të martën. Ndërkohë, shumë dyqane në zonë u mbyllën në shenjë proteste.
Situata u përshkallëzua kur forcat e sigurisë përdorën gaz lotsjellës për të shpërndarë turmën. Pamje të publikuara në rrjete sociale tregojnë përdorimin e gazit edhe pranë një spitali dhe në një stacion metroje në Teheran. Mediat shtetërore iraniane nuk e raportuan menjëherë incidentin, një praktikë e përsëritur që nga nisja e protestave më 28 dhjetor.
Demonstratat pritet të intensifikohen edhe më tej, pasi Banka Qendrore e Iranit ka ulur ndjeshëm kursin e subvencionuar të dollarit për importuesit dhe prodhuesit. Kjo masë pritet të sjellë rritje çmimesh, të cilat do të reflektohen drejtpërdrejt te konsumatorët, të cilët tashmë janë rënduar nga vitet e sanksioneve ndërkombëtare.
Presidenti reformist i Iranit, Masoud Pezeshkian, ka urdhëruar një hetim qeveritar për një nga incidentet e lidhura me protestat, por njëkohësisht ka pranuar se situata mund të jetë duke dalë jashtë kontrollit.
“Nuk duhet të presim që qeveria t’i përballojë të gjitha e vetme. Qeveria thjesht nuk e ka këtë kapacitet”, u shpreh ai në një fjalim televiziv.
Irani ka përjetuar disa valë protestash kombëtare vitet e fundit. Pas shtrëngimit të sanksioneve dhe pasojave të luftës 12-ditore me Izraelin në qershor, monedha iraniane pësoi një rënie drastike, duke arritur në dhjetor nivelin 1.4 milion rialë për 1 dollar. Të martën, dollari u këmbye me 1.46 milion rialë, një rekord i ri negativ.
Për krahasim, para Revolucionit Islamik të vitit 1979, kursi ishte rreth 70 rialë për 1 dollar, ndërsa në kohën e marrëveshjes bërthamore të vitit 2015, dollari këmbehej me rreth 32 mijë rialë.
