Një situatë e rrezikshme po ndodh në fshatin Orgjost, në rrethin e Kukësit, ku si pasojë e reshjeve të shumta të ditëve të fundit, ura kryesore që lidh zonën me pjesën tjetër të fshatit është dëmtuar rëndë.
Sipas banorëve, një pjesë e urës është shembur, duke e bërë të pamundur kalimin si për këmbësorët ashtu edhe për automjetet. Si rezultat, fshati ka mbetur i izoluar, ndërsa rreziku për jetën dhe sigurinë e banorëve është i lartë, veçanërisht në rast emergjencash shëndetësore apo nevoje për ndërhyrje të shpejtë.
Ajo që e bën situatën edhe më shqetësuese është mungesa e reagimit nga institucionet përgjegjëse. Deri më tani, sipas banorëve, nuk ka pasur asnjë inspektim serioz apo ndërhyrje konkrete nga Bashkia Kukës apo strukturat përkatëse, ndonëse rreziku është i dukshëm dhe pasojat mund të jenë të rënda.
Banorët i bëjnë thirrje Bashkisë Kukës me në krye Albert Halilin që të ndërhyjnë menjëherë për inspektimin dhe rikonstruksionin e urës, përpara se situata të përkeqësohet dhe të vihet në rrezik jeta e banorëve.
