Gjirokastra është përfshirë nga përmbytjet pas reshjeve të dendura të orëve të fundit, duke krijuar një situatë të rënduar për qytetin dhe bizneset lokale. Uji ka mbushur rrugët dhe zonat përreth, duke ndërprerë qarkullimin dhe duke shkaktuar dëme të mëdha në infrastrukturë.
Ndër bizneset më të prekura ka qenë një furrë buke, ku uji ka arritur nivelin prej 1.5 metrash brenda ambientit të punës. Të gjitha paisjet janë shkatërruar, dhe dëmi financiar nga ky incident vlerësohet të jetë mbi 200 mijë euro, një humbje që godet rëndë pronarët, duke i lënë ata të pambrojtur përballë situatave të tilla emergjente.
Ky incident tregon qartë jo vetëm pasigurinë e infrastrukturës lokale, por edhe mungesën e përgatitjes dhe menaxhimit të emergjencave nga autoritetet vendore. Bashkia e Gjirokastrës duket se nuk ka marrë masat e nevojshme për të parandaluar dëme të tilla, duke e lënë qytetin dhe bizneset e tij në një gjendje të pasigurt.
Rastet si ky i furrës së bukës janë një paralajmërim serioz, ndërhyrjet e autoriteteve janë të domosdoshme për të parandaluar që katastrofa të përsëritet dhe për të mbrojtur ekonominë dhe sigurinë e komunitetit në të ardhmen. Pa një menaxhim më të mirë dhe plane emergjente të efektshme, Gjirokastra rrezikon të pësojë dëme edhe më të mëdha nga përmbytjet që mund të vijnë.
