Shqipëria është përfshirë sot nga moti i keq, duke krijuar situata mjaft problematike në shumë qytete dhe zona rurale të vendit. Si pasojë e përkeqësimit të kushteve atmosferike, vijon pezullimi i lundrimit detar për të gjitha mjetet e vogla dhe peshkarexhat.
Gjithashtu, janë anuluar lundrimet drejt Italisë për shkak të erërave të forta dhe dallgëve që arrijnë deri në 7 ballë. Ndërkohë, Kapiteneria e Portit të Vlorës u ka bërë thirrje të gjitha mjeteve të vogla lundruese, përfshirë ato me tonazh të lehtë dhe mjetet e peshkimit, të qëndrojnë të ankoruara dhe të presin një njoftim të dytë, pasi parashikimet tregojnë për përkeqësim të mëtejshëm të motit dhe rrezik serioz për mbytje.
Sa i përket transportit detar të pasagjerëve, nisja e tragetit nga Brindisi drejt Vlorës parashikohet të realizohet në orët e mbrëmjes, në varësi të përmirësimit të kushteve të erës dhe dallgëzimit të detit.
