Reshjet intensive të shiut të orëve të fundit kanë shkaktuar përmbytje në disa segmente rrugore dhe zona urbane të qytetit të Durrësit. Si pasojë e situatës, autoritetet kanë vendosur pezullimin e procesit mësimor në të gjitha shkollat dhe në Universitetin “Aleksandër Moisiu”.
Problematika më e theksuar paraqitet në zonat përreth stadiumit, Spitallë dhe NISH Tulla, ku uji ka vërshuar rrugët dhe hapësirat përreth. Oborri i Universitetit “Aleksandër Moisiu” ndodhet nën ujë, ndërsa prani e konsiderueshme uji raportohet edhe në disa biznese dhe oborre banesash në zonën e njohur si “Ish-Këneta”.
Vështirësi serioze janë evidentuar edhe në rrugën interurbane Tiranë–Durrës, pranë karburantit në hyrje të qytetit, ku prezenca e lartë e ujit në të dyja anët e lëvizjes e bën të pamundur qarkullimin normal të automjeteve.
Për të shmangur trafikun e rënduar dhe rrezikun e aksidenteve, Policia Rrugore ka njoftuar devijimin e qarkullimit. Automjetet që vijnë nga jugu në drejtim të Tiranës do të qarkullojnë nga Rruga e Plepave për në Ndroq dhe më pas në aksin “Rrogozhinë–Elbasan–Tiranë”. Ndërsa për në Durrës, kalimi do të kryhet nga rruga e universitetit në drejtim të Spitallës dhe në aksin “Tiranë–Elbasan–Rrogozhinë”.
