Mosha mesatare në të cilën gratë zgjedhin të bëhen nëna për herë të parë po rritet nga viti në vit, një trend i dukshëm në të gjithë Evropën. Sipas të dhënave më të fundit të Bashkimit Evropian, mosha mesatare e lindjes së parë në BE ka arritur në 29.8 vjeç.
Megjithatë, kjo shifër ndryshon ndjeshëm nga një vend në tjetrin. Në Moldavi, gratë bëhen nëna për herë të parë mesatarisht në moshën 24.7 vjeç, ndërsa Italia kryeson me moshën më të lartë, 31.8 vjeç.
Edhe Shqipëria ndjek të njëjtin trend në rritje. Gratë shqiptare po bëhen nëna për herë të parë në moshën mesatare 29.5 vjeç, një shifër që pasqyron ndryshimet sociale dhe ekonomike të viteve të fundit.
Ekspertët theksojnë se vonimi i prindërimit lidhet kryesisht me emancipimin e vajzave dhe grave, të cilat zgjedhin fillimisht të përfundojnë arsimin, të sigurojnë stabilitet financiar dhe të krijojnë marrëdhënie të qëndrueshme përpara se të kenë fëmijë.
Në Evropën Lindore dhe Qendrore, gratë zakonisht bëhen nëna në mesin e të 20-ave, ndërsa në Evropën Perëndimore dhe Jugore, shumë prej tyre presin deri në fillim të të 30-ave.
Megjithëse ekspertët paralajmërojnë se shtyrja e lindjes mund të rrisë rrezikun e problemeve të fertilitetit, për shkak se biologjia mbetet e pandryshuar, të dhënat tregojnë se vendet ku gratë presin më gjatë për t’u bërë nëna nuk kanë domosdoshmërisht familje më të vogla. Në shumë raste, ato vazhdojnë të kenë një numër relativisht të lartë fëmijësh.
